सोलापूर, दि.09 : रस्त्याच्या दुतर्फा गावातील महिलांची शिस्तबद्ध रांग…प्रत्येकाच्या हातात रंगीबेरंगी फुले…पारंपारिक वाद्यांचा कडकडाट…फटाक्यांची आतषबाजी अन् मिरवणुकीत सहभागी प्रत्येक ग्रामस्थांच्या चेहऱ्यावरचा आनंद..! अशा या प्रसन्न वातावरणात जागतिक महिला दिनी सोलापूर जिल्हा परिषदेच्या मुख्य कार्यकारी अधिकारी मनिषा आव्हाळे यांची बग्गीतुन मिरवणुक व जेसीबीतुन मुक्त फुलांची उधळण करत चपळगांव ग्रामपंचायत व ग्रामस्थांनी नागरी सन्मान केला…!
जागतिक महिला दिन व महाशिवरात्रीच्या निमित्त चपळगाव ता.अक्कलकोट येथील ग्रामस्थांनी अनोख्या पद्धतीने महिला दिन साजरा केला व संपूर्ण जिल्ह्याचे लक्ष वेधून घेतले.या कार्यक्रमाचे अध्यक्षस्थानी सरपंच वर्षा भंडारकवठे होत्या.तर यावेळी सेवानिवृत्त अंगणवाडी पर्यवेक्षिका सुनंदा राजेगावकर, प्रा.डॉ.शिला स्वामी, रिणाती संस्थेच्या सचिवा रोहिणी पाटील, ग्रा.पं.सदस्या रेश्मा तांबोळी, वंदना कांबळे, वर्षा सोनार, चित्रकला कांबळे, गंगाबाई वाले, डॉ.लता रणखांबे, शोभा गजधाने, कोंडाबाई कांबळे
विस्तार अधिकारी पंचायतचे युसुफ पठाण, तालुका वैद्यकीय अधिकारी आश्विन करजखेडे,आरोग्य विस्तार अधिकारी महेश भोरे, ग्रामसेवक सोमलिंग कणगी, परमेश्वर बिराजदार, श्रीधर नडीमेटला, डॉ.मनिष उमराणीकर,पोलिस पाटील विवेकानंद हिरेमठ,आरोग्य केंद्रातील आरोग्य सेवक-सेविका,आशा वर्कर्स, अंगणवाडी सेविका-मदतनीस, जिल्हा परिषद शाळेचे कर्मचारी,बचत गटाचे सदस्य व चपळगाव,बावकरवाडीतील महिला व ग्रामस्थ मोठ्या संख्येने उपस्थित होते.या कार्यक्रमाच्या प्रारंभी उपस्थित मान्यवरांच्या हस्ते क्रांतीज्योती सावित्रीबाई फुले यांच्या प्रतिमेचे पूजन करण्यात आले व प्रार्थना घेण्यात आली.यावेळी महिला सक्षमीकरण याबाबत मनोगत व्यक्त करताना सुनंदा राजेगावकर,रोहिणी पाटील व शिला स्वामी यांनी प्रत्येक घरातील महिलांनी सबला बनण्याचे आवाहन केले.सदर कार्यक्रमाचे सूत्रसंचालन शंभुलिंग अकतनाळ यांनी तर आभार डॉ.विजयालक्ष्मी भंडारकवठे यांनी मानले.
चपळगांवचीच लेक समजुन केलेला सन्मान खरोखरच लाखमोलाचा…!
मी चपळगांवचीच लेक समजुन केलेला सन्मान खरोखरच लाखमोलाचा आहे.महिला दिनानिमित्त एखाद्या खेडेगावात नागरी सन्मान होणे मोलाचे आहे.परंतु चपळगाव वासियांनी आपल्याच गावातील मुलगी मोठ्या हुद्द्यावर गेली आहे व तिचा नागरी सन्मान करणे हे प्रत्येकाचं कर्तव्य समजून गावातून मिरवणूक काढून माझा सन्मान केला हे मी माझे भाग्य समजते.या सन्मानाने मी भावनिक झाले. आपल्या घरातील मुलींना तिची स्वप्ने पूर्ण करण्यासाठी प्रत्येक आई-वडिलांनी बळ देण्याची गरज आहे आणि मुलींनीही इतरांपेक्षा वेगळी स्वप्ने पाहिली पाहिजेत व ती पूर्ण करण्यासाठी जिद्द व चिकाटी ठेवून स्वप्न साध्य केले पाहिजे.यासाठी कष्टाची तयारी असावी. पालकांनी आपल्या मुलींना त्यांची स्वप्ने साध्य करण्यासाठी शिस्तीची जोड देऊन स्वातंत्र्य दिले पाहिजे अशी अपेक्षा मुख्य कार्यकारी अधिकारी मनिषा आव्हाळे यांनी व्यक्त केली.
