मंगळवेढा, दि.26 : आवताडे शुगर या कारखान्यांच्या माध्यमातून आजपर्यंत शेतकऱ्यांची सेवा केल्याचा मला अभिमान आहे. आपण केवळ आर्थिक प्रगतीकडे लक्ष केंद्रित न करता सामाजिक जबाबदारीही पार पाडत आहोत. प्रत्येकाने आपल्या कार्यातून सकारात्मक बदल घडवून आणण्यासाठी प्रयत्न केला पाहिजे. आपल्या कारखान्याने मागील वर्षी 4 लाख 4 हजार 484 मे. टन गाळप करून 3 लाख 79 हजार 200 क्विटल साखर उत्पादित केलेली आहे. त्याच बरोबर चालू हंगामात आपल्या कारखान्याने आजपर्यंत 66 दिवसात 2 लाख 66 हजार 740 मे. टन इतके गाळप करून साखर 2 लाख 58 हजार 200 क्विटल साखर उत्पादित केलेली असून सरासरी साखर उतारा 10.00 % इतका आहे. याही वर्षी आपले सर्व कर्मचारी आपण दिलेले उद्दीष्ट पूर्ण करतील हा माझा विश्वास आहे. कर्मचाऱ्यांनी प्रामाणिक योगदान दिल्यामुळेच कारखानदारी यशस्वी होत असून त्या कर्मचाऱ्यांचेही सुखदुःख पाहणे आमचे कर्तव्य आहे, त्यामुळे आज प्रजासत्ताक दिनाचे औचित्य साधून कर्मचाऱ्यांना वेतन वाढ करत असल्याचे अवताडे शुगरचे चेअरमन संजय आवताडे यांनी ध्वजवंदनानंतर बोलताना जाहीर केले.
संजय आवताडे पुढे म्हणाले की, आज आपण या ठिकाणी 26 जानेवारी 2025 रोजी 76 वा प्रजासत्ताक दिन साजरा करण्यासाठी एकत्र जमलेलो आहोत. 15 ऑगस्ट 1947 रोजी आपल्या देशाने स्वातंत्र्य मिळवले आणि त्यानंतर 26 जानेवारी 1950 रोजी आपण प्रजासत्ताक बनलो. हा दिवस भारताच्या इतिहासात अतिशय महत्त्वाचा आहे कारण, या दिवशी आपल्या संविधानाची अंमलबजावणी करण्यात आली. आपल्या संविधानाने आपल्या देशाला लोकशाही, न्याय, समता आणि स्वातंत्र्य यांची शिकवण दिली आहे.
आपले आमदार समाधान आवताडे यांचे मार्गदर्शनाखाली कारखान्याचे कामकाज अतिशय योग्य व चांगल्या प्रकारे चालू असून, आपल्या कारखान्याचा उद्देश फक्त आर्थिक प्रगती करणे नाही, तर आपल्या सर्व कामगार बंधू, शेतकरी वर्ग यांचे जीवनमान उंचावणे असून त्या दृष्टीने आपण खालील प्रमाणे यापूर्वी कामगाराना वेतन वाढ दिलेली आहे.
दैनिक वेतनावर कामा करणाऱ्या कामगारास जून 2024 पासून हंगाम 2022-23 मध्ये रुजू झालेल्यांना रु.2000 व 2023-24 मध्ये कामावर हजर झालेल्यांना रु.1750 प्रमाणे वेतन वाढ देण्यात आली आहे. तसेच हंगामी कामगारासही नोव्हेबर २०२४ पासून हंगाम 2022-23 मध्ये रुजू झालेल्यांना रु.2000 व हंगाम 2023-24 मध्ये रुजू झालेल्यांना रु.1500 प्रमाणे वेतन वाढ दिलेली आहे. त्याच बरोबर आज प्रजासताक दिनाचे औचित्य साधून, कायम सेवेतील कामगारासाठी माहे जानेवारी २०२५ पासून हंगाम 2022-23 मध्ये कामावर हजर झालेल्यांना 10 %, हंगाम 2023-24 मधील कामगारास 7.5 % व हंगाम 2024-25 मधील कामगारास 5 % वेतन वाढ देण्यात येईल.आपण एकजुटीने काम करून आपल्या कारखान्याला अधिक प्रगत बनवू या असे आवाहनही त्यांनी यावेळी केले.
यावेळी कारखान्याचे मुख्य कार्यकारी अधिकारी कुर्मदास चटके, कार्यकारी संचालक मोहन पिसे, भारत निकम, जनरल मॅनेजर (टेक्निकल) सुहास शिनगारे, मोहन पवार, संभाजी फाळके, बजिरंग जाधव, राहुल नगणे, तोहिद शेख, दामोदर रेवे, अभिजित पवार, चंद्रकांत राठोड, रणजीत पवार, सुधाकर पाटील, रणजीत रणदिवे, अमोल शिंदे, सर्व खातेप्रमुख, विभागप्रमुख, कर्मचारी बंधु व उपस्थीत होते.
